amor adolescente

Adolescente

namorado

converso.

Namorado estaba en adulto silencio,

sen saberme, sequera imaxinarme,

correspondido.

Pensarte,

pensarme xunto a ti estimula meu desexo

saber que ti pénsalo mesmo faime tolear…

Coñecía ben meus sentimentos,

paralizábanme arreguizos co fitar de túa ollada melosa

ficaba teso coma carambelo pendurado

ao teito

na invernía dun xaneiro,

corría apresurada sarabia en labirínticas veas xeadas

coa viruxe da túa frívola presenza

apurando o tempo en mimética lentitude

dunha solitaria folerpa

caendo ao enxoito chan onde esvaecerse

coa mesma cachaza da aterraxe.

Compartir todo isto contigo

convérteme nun neno, un neno parvo,

desamalloa o forte nó dun tempo perdido,

no que non era máis que aquel pailán.

Conto as horas para estar xunto a ti,

a teu lar e abrazarte de xeito apaixonado

protexéndome, iso si,

da friaxe que provocas en min.