Hai un par de anos non se falaba de outra cousa na Limia. O PP encargárase de meterlle o medo no corpo a xente, amedrentándoos con que o plan que o PSOE preparaba para A Limia ía facer que moitos propietarios se visen privados das súas terras e moitos outros visen restrinxida a súa actividade sobre as mesmas. Empapelaron toda a comarca con carteis da plataforma ZEPA NON, encheron autobuses, pagados con fondos municipais, para levar de excursión ós agricultores -como os da foto- a capitalidade da comarca. Dende o BNG non se oíu nin chío. Quizais algunhas críticas cara o SLG, máis fortes no ámbito privado que no público, pola participación na convocatoria e co-organización das mobilizacións de protesta. Dicían entón que o ZEPA non era da súa incumbencia, que se trataba dunha área do PSOE e non lles correspondía meterse aí.
PP e BNG mantivéronse nas súas posicións ata o 1 de marzo, uns continuando asustando ós vellos -e ós non tan vellos- e os outros mirando cara outro lado. A partir daquela data, e co cambio de goberno en Galiza, ós asustavellos tocoulle levar a práctica o ZEPA de A Limia, e fano sen rechiar, obrigados pola normativa europea, iso si, facendo o menor ruído posible para que non se enteren os veciños. Os outros, os do BNG, agora posiciónanse en contra, nun acto puro de incoherencia e demagoxia, tratando de atraer, cara si, o voto daqueles que aínda non lle pasou o medo.
Nin o posicionamento duns -PP- nin de outros -BNG- resulta agora crible xa que mudaron o seu discurso o pasar da oposición ó goberno e viceversa. En ningún momento, nin dende unha posición, nin dende a outra, trataron de informar ós veciños sobre cales son as verdadeiras razóns para introducir un ZEPA na Limia -obriga da UE-, cal vai ser o alcance da mesma, como lle vai afectar ós agricultores -restricións, compensacións,…- ou que obxectivos se pretende acadar, pois a recuperación de parte do humidal tamén traerá beneficios para a zona. Só se adicaron a desinformar, a manipular, a cabrear a xente e de aí, do cabreo, arrabuñar o seu voto.
Agora mesmo, na comarca, todos son conscientes de quen si foi de fronte, quen lles falou claro, quen tratou de informalos -aínda que non lles fixeran caso-, asumindo que a verdade non ía gustar. Ese partido foi o PsdeG i é quen ten agora todas as de gañar, por manter o mesmo discurso, por conservar a coherencia.
Persoalmente, agardo que A Limia aproveite esta oportunidade. Quen sabe si será a última.
Nom entendo algo… que dano lhe vai fazer ós donos das terras que se protejam as aves na limia, que se creie essa zona de protecçom? Acasso lhe vam impedir cultivar ou algo??? Nom o entendo…
Creio que tudo é o que ti dis, moito asustavello e demagogo. Mas há algumha restricçom com a instalaçom da ZEPA?
Si lles afecta. Vaise limitar o uso de fitosanitarios, abonos,… Isto supón que en moitos casos haberá que pasar da agricultura intensiva a agricultura sostible (ecolóxica). Isto a moitos agricultores parécelle unha involución (deixar o trator e volver o sacho, din) e non poden estar máis errados. Coa agricultura intensiva só gañan cartos as grandes multinacionais -ollade o prezo do leite, dos cereais ou os da pataca-, non eles, que utilizan o seu risco, a súa inversión, para obter financiamento gratuíto (levan o produto, véndeno nas súas superficies e logo non llo pagan ata pasados uns meses).
A min paréceme unha boa oportunidade para reconverter a economía da zona no que sempre foi, volvendo a producir o produtos de calidade, abandonar a produción intensiva subvencionada (non os subvencionan a eles senón as grandes multinacionais, que grazas a estas axudas poden forzar ós agricultores a vender por debaixo do prezo de produción), o mesmo tempo que se conserva un entorno natural privilexiado: A Lagoa de Antela (o que foi, no seu tempo, o maior humidal de Europa)
Entendo. Aquí e “evoluçom” também está de moda já há muito crendo eles que é muito melhor ganhar quatro pesos que conservar a saúde (já nom quero falar do que pensariam eles da riqueça meio ambiental).
Aqui por ponher um exemplo fartam-se de empregar produtos nas vinhas para o podre, é dizer, para que a uva se conserve bem ata a vindima e vendam máis kilos a adegas. Ganham máis e logo quando eu adoito ler os prospectos desses produtos pom que som cancerixenos e demáis. Despois algum viticultor ouve-se que tem umha enfermidade da pel e que nom pode ir a vinha e coussas asi, ou que tem calquera coussa que que casualidade se semelha as que advirtem esses prospectos que nom lem ou nom lhes interessa ouvir o que ponhem. E já por nom falar da gente que se envelena tomando os vinhos dessas adegas que lhe mercam a uva. Eu desde logo nom o bebo.
Vamos, seguridade alimentária.
Moi parecida a situación á dos Ancares, inda que con diferencias.
PP na oposición=Parque non. Manipulación, e mentiras a cachón, cos movementos dos caciques locais de turno para por a xentiña en contra do Parque.
PP no goberno=Parque si.
Agora nace o sementado, e non é de cor verde precisamente.
Máis ben é o negro das cinzas dos incendios acontecidos despois da reunión-almorzo, no albergue dos Ancares co conselleiro MR, co Xefe provincial de incendios (suxeito con grave adicción cinexética), co aspirante á alcaldía de Navia (Presi coto caza) e demais contrarios ó parque. LA VOZ DE GALICIA 7/09/09
A volta os tempos nos que cando ía Fraga ós montes dos Ancares, os vía afumados e morenos non quedou atras.
Me cajo na…
O aproveitamento da ignorancia da xente é un insulto, e unha falta de respecto total por parte destes impresentables.
Os seus intereses non llos para nin a conciencia porque carecen dela.
Unha magoa.
Si todos nos enganan unha e outra vez… algo haberá que facer, non?
Ultimamente en política e máis dende o paso do Bloque pola Xunta, quédome con este proverbio arabe: a primeira vez que me enganes a culpa sera túa; a segunda vez, a culpa será miña.
Comparto plenamente moitos dos últimos artigos publicados. Outro galo cantaría se moita xente que se autodenomina nacionalista “abrise” un pouco máis os ollos.
Umha reflexom muito boa com uns comentários que nom lhe desmerecem nada. O da Lagoa de Antela foi um crime, como é um crime dar o sistémico quinze dias de colher as patacas – como se tem feito-. Do papel do BNG em todo isto quase melhor nem falar, quando as ideias nom estám claras e se anda a dar bandaços passa o que passa. Fica às claras que o futuro da pataca da Límia tem que ser redifinido e buscar qualidade e sustentavilidade, aliás os produtores teriam que vender o produto em bloco para obter melhores preços, claro que se ouve muito (coma no leite) que “eu prefiro vendê-las a um céntimo a tirá-las”. Que lhas colham ou nom ao do lado é-lhes igual… u-la cultura agrária galega de solidariedade e trabalho comunal? O progresso era o capitalismo, o progresso é subvencionar a compra de carros, nom reduzir o seu uso… aí entra o discurso do depoimento ao que o Carlos Taibo tem achegado tam boas e incisivas contribuiçons.
Umha aperta irmandinha